კონდენსაციური ქვაბის ტექნოლოგია და უპირატესობები

01 ნოე. 2016

ცენტრალური გათბობის კონდენსაციური ქვაბის მწარმოებლები  მომხმარებელს სთავაზობენ ხარჯების 30%-ით შემცირებას და ეკოლოგიაზე ზრუნვას. აღნიშნულ სიახლეს და ტექნოლოგიურ უპირატესობებს კონდენსაციური ქვაბის მოკლე მიმოხილვით გაგაცნობთ.

ჩვეულებრივ გათბობის ქვაბში სისტემიდან ცივი წყალი შედის თბომცვლელში, სადაც ბუნებრივი აირის წვის შედეგად წარმოქმნილი სიმხურვალე გადაეცემა და წყალი ცხელდება. მიღებული ცხელი წყალი უბრუნდება გათბობის სისტემას და ათბობს რადიატორებს, საიდანაც სითბო ოთახებში ნაწილდება. ასეთი ქვაბების ენერგოეფექტურობა 92%-მდე აღწევს, ესეც ოპტიმალურ პირობებში. დარჩენილი დაახლოებით 8%-ანი დანაკარგი გამონაბოლქვის სახით გამოიდევნება საკვამურიდან. ამ დროს გამონაბოლქვის ტემპერატურა 120-150 გრადუსია. გამონაბოლქვს ასევე თან ახლავს აირის დაუწვავი ნარჩენები, რაც გარემოს აზიანებს.

კონდენსაციური ქვაბის მწარმოებლები აცხადებენ რომ ისინი ეფექტურობასაც ზრდიან და გარემოზე მიყენებულ ზიანსაც ამცირებენ. ეს კი ორი თანამედროვე ტექნოლოგიის კომბინირებით  მიიღწევა.

პირველი ესაა ჰაერისა და ბუნებრივი აირის ოპტიმალური შერევა. თბომცვლელის დიზაინი და ჭკვიანი ვენტილატორი საშუალებას იძლევა ჰაერის და ბუნებრივი აირის შერევა ოპტიმალური ფარდობით მოხდეს. შედეგად, აირი ბოლომდე იწვის და არ გვაქვს დანაკარგი საკვამური მილიდან გამოტყორცნილი დაუწვავი ნარჩენების სახით.  ეს დაახლოებით 6%-ით ზრდის წვის ეფექტურობას.

წვის შედეგად წარმოქმნილი ნამწვი აირების ტემპერატურა აქაც 120-150 გრადუსს აღწევს, თუმცა ისინი საკვამურ მილში გადასვლამდე კიდევ ერთ პროცესს გადიან. კონდენსაციური თბომცვლელი ცხელ აირებს ახვედრებს სისტემიდან შემომავალ ცივი წყლის ნაკადებს. ამ დროს აირის სიმხურვალე გადაეცემა წყალს, რომელიც შემდეგ გადადის მთავარ თბომცვლელში და ალით დამატებით ცხელდება საჭირო დონემდე. ნამწვი გაზის ტემპერატურა 55 გრადუსზე ქვემოთ ეცემა, რა დროსაც ნამწვიდან წარმოიქმნება კონდენსატი, რაც ქვაბიდან სპეციალური მილით წყლის სახით გამოიდევნება.  შედეგად, მაქსიმალურად გამოიყენება ბუნებრივი აირის წვით მიღებული ენერგია.

ქვემოთ მოცემულ ნახაზზე მიღებული ეკონომია კარგად ჩანს. აირის სრული წვით მიღებული თბური ენერგია არის 100%. ამ 100%-ის 11% დამატებით ნამწვის სახით იკარგება. ასე რომ, თუ ჩავთვლით, რომ პოტენციურად , დანაკარგების გარეშე 111% ეფექტურობის მიღებაა შესაძლებელი, გამოვა რომ, როდესაც ჩვეულებრივი ქვაბი 92%-ან ეფექტურობას გვაძლევს, ALARKO-ს კონდენსაციური ქვაბი 109,2%-მდე ეფექტურობას აღწევს. 

ასე რომ, მიუხედავად შედარებით სიძვირისა, კონდენსაციური ქვაბი 2-3 წელიწადში შემცირებული საწვავის ხარჯით მიღებული ეკონომიით სრულად ანაზღაურებს ჩვეულებრივ ქვაბთან არსებულ საფასო სხვაობას. ამასთან, თუ გავითვალისწინებთ, რომ ხარისხიანი ქვაბი 7-10 წელი უპრობლემოდ მუშაობს, თავად დაინახავთ, რომ კონდენსაციური ქვაბის შეძენა ნამდვილად ჭკვიანური გადაწყვეტილებაა.

სხვა სიახლეები

07

თებ

---

2017

იატაკის გათბობის შესახებ

01

ნოე

---

2016

Master-ის ინდუსტრიული დანიშნულების გამათბობლები

01

ოქტ

---

2016

აქცია მირაში!